Müsahibə

Hər dəfə o zəng edəndə, ona dəstəkverici sözlər deməyə çalışırdım, tövsiyyələrimi edirdim – MÜSAHİBƏ

Rezonans.az -ın “Vətən müharibəsi iştirakçılarını tanıyaq!” silsiləsi ilə əlaqədar növbəti müsahibi  ötən ilin 44 günlük müharibəsinə əsgər qismində, könüllü olaraq qatılan 32 yaşlı Cavid Quliyevdir.

Bu Vətən oğlu barədə məlumatları bizə onun atası, hazırda Xırdalan şəhərindəki AAAF Park “Green Park Servis” MMC-nin əməkdaşı Zahid Quliyev təqdim edir.

– Hörmətli Zahid müəllim! Sizi salamlayırıq. Aldığımız məlumata əsasən, oğlunuz Cavid ötən il Ali Baş Komandanın səfərbərlik çağırışına etinasız qalmayıb və öz istəyi ilə cəbhəyə gedib, döyüş əməliyyatlarına qatılıb. Oğlunuz haqqında oxucularımıza məlumat verməyi xahiş edirik.

– Mən də sizi salamlayıram. Rezonans.az-ın “Vətən müharibəsi iştirakçılarını tanıyaq!” silsiləsini təqdirəlayiq hesab edirəm. Bu silsilədə təqdim olunan hər bir iştirakçı Vətən tariximiz üçün önəmli şəxsiyyətlərdir.

Məhz Ali Baş Komandan, cənab İlham Əliyevin məqsədyönlü siyasəti və ordumuzun gücü bizə ötən il qələbə sevincini yaşatdı. Şəhidlərimizin müqəddəs ruhu bizim üçün əzizdir. Bu şanlı qələbədə payı olan qazilər və digər iştirakçıların xidməti sözlərə sığmayacaq qədər böyükdür. Məhz bu səbəbdən də sizə oğlum barədə məlumatları söyləməyi vacib bildim.

Oğlum – Quliyev Cavid 10 oktyabr 1989-cu ildə Cəlilabad rayonunun Günəşli kəndində dünyaya gəlmişdir.

2006-cı ildə həmin kənddə orta təhsil təhsilini bitirmiş və növbəti il həqiqi hərbi xidmətə getmişdir. 2009-cu ildə Murovdağ ərazisində həqiqi hərbi xidmətini tamamladıqdan sonra əmək fəaliyyətinə başladı.

Cavid ailəlidir, övladları var.

Təvazökarlıqdan uzaq olsa da, deməliyəm ki, Cavid çox zəhmətkeş, həyatda hər vəziyyətə qatlaşmağa çalışan oğuldur. O, elektrotexnika və digər məişət sahələri üzrə yaxşı mütəxəssisdir. Həyatı boyu halal zəhməti ilə ruzisini qazanıb, ailə başçısı olaraq ailəsinin maddi ehtiyacını ödəyib.

Mən həm bir valideyn, həm də bir müəllim olaraq hələ kiçik yaşlarından Cavidə “Vətən” anlayışını aşılamağa çalışmışam, vətənpərvərlik ruhunda tərbiyə etmişəm.

Cavid də digər qeyrətli oğullarımız kimi, Qarabağ torpaqlarının düşmən işğalında olmasına etinasız qala bilmədi.

O ötən il oktyabr ayının əvvəllərində mənə cəbhəyə gedərək döyüşlərə qatılmaq istədiyini bildirəndə, qəlbimdə təbii ki, bir valideyn olaraq narahatlıq hissi yaşadım… Lakin cəsarətimi topladım və ona belə dedim: “Get oğlum! Bəs sən də getməsən, kim getməlidir? Bu Vətən hamımız üçün əzizdir! Sənə valideynlik haqqımı halal edirəm!”.

Mən anlayırdım ki, Cavid cəbhəyə getsə, onun övladları atasına həsrət qalacaq, həm də ailədə maddi ehtiyac yarana bilər … Yarana biləcək bütün bu çətinliklərə baxmayaraq, Cavidi niyyətindən döndərməyə çalışmadım.

– Sizə halal olsun! Sizin kimi valideynlərin tərbiyəsi, həm də Cavid kimi oğulların qeyrəti sayəsində Qarabağ yurdu azadlığına qovuşdu.  Cavid hansı bölgələrdəki döyüşlərdə iştirak edib?

– O “snayperçi”, “pulemyotçu” qismində  Füzuli, Cəbrayıl, Qubadlı, Hadrut rayonlarının işğaldan azad olunması uğrunda döyüşlərə qatılıb.

Cavidə görə çox həyəcan keçirirdik. Hər dəfə o zəng edəndə, ona dəstəkverici sözlər deməyə çalışırdım, tövsiyyələrimi edirdim. Hər dəfə şəhidlər, qazilər haqqında xəbərlər eşidəndə, oğlumu düşünürdüm… Şükrlər olsun Yaradana o, ötən il 29 dekabrda salamat qayıtdı.

– Aldığımız məlumata əsasən, Cavid həm də təltiflərə layiq görülüb? 

– Bəli, haqlısınız. Hörmətli Ali Baş komandan, cənab İlham Əliyevin Sərəncamına əsasən oğlum Cavid Quliyev “Füzulinin azad olunmasına görə” və “Vətən müharibəsi iştirakçısı” medallarına layiq görülüb.

– Müsahibəyə görə sizə təşəkkür edirik! Sizin kimi nümunəvi valideyn və Cavid kimi oğullar xalqımızın fəxridir. Oxucularımıza məsləhətlərinizi söyləməyi xahiş edirik.

– Mən bir valideyn kimi fəxr edirəm ki, oğlum ötən ilin II Qarabağ müharibəsində iştirak edib.

Rezonans.az-ın oxucularına Vətəni sevməyi və lazım gəldiyi anda onun uğrunda candan belə keçməyə hazır olmağı tövsiyyə edirəm!

 

Aygün Məmmədova

Ətraflı

Bənzər məqalələr

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button