Pakistanın Azərbaycandakı fövqəladə və səlahiyyətli səfiri cənab Bilal Haye əsasən tikinti sektorunda geniş istifadə olunan müxtəlif təyinatlı metal məmulatlarının istehsalı və satışı üzrə regionda lider şirkətlərdən olan “Unimetal” MMC-nin istehsal müəssisələrini ziyarət edib.
Rezonans.az xəbər verir ki, Pakistan-Azərbaycan Ticarət Palatasının (PAKAZCHAM) təşəbbüsü ilə təşkil olunmuş bu ziyərətdə qonaqlar buradakı istehsal prosesləri ilə yaxından tanış olub, həmçinin “Unimetal”ın istehsalı olan müxtəlif məhsulların keyfiyyət göstəricilərini əks etdirən laboratoriya testləri əyani şəkildə qonaqlara təqdim olunub.
Daha sonra şirkət rəhbərliyi ilə aparılan qarşılıqlı müzakirələr zamanı iki ölkə arasında siyasi münasibətlərin yüksək səviyyədə olmasından söhbət açan səfir iqtisadi-ticari əlaqələrin də inkişaf etdirilməsinin vacibliyini vurğulayıb və bununla əlaqədar olaraq hər iki ölkə rəhbərliyinin təşəbbüs və niyyətlərini diqqətə çatdırıb. Eyni zamanda Azərbaycan – Pakistan arasında idxal-ixrac məhsullarının potensialından da söz açan səfir bu istiqamətdə ticarət əməliyyatlarının daha da genişləndirilməsi üçün iş adamlarının aktiv rol almalarının əhəmiyyətini vurğulayıb. “Unimetal” rəhbərliyi də Prezident İlham Əliyevin ölkəmizdə sahibkarlığın inkişafına göstərmiş olduğu qayğıdan və bu istiqamətdə yerli istehsalçılara verilən müxtəlif təşviq proqramlarından bəhs edərək iki ölkə arasında idxal-ixrac və ticarət əlaqələrinin inkişaf etdirilməsi üçün yeni həll yolları axtarmağın vacibliyini vurğulayıb.
Qeyd edək ki, “Unimetal” MMC metal boru və profillərin, rəngli dam örtüklərinin, yayma məhsullarının və digər müxtəlif metal məhsulların istehsalçısı və tədarükçüsüdür. Həmçinin şirkət nəinki Azərbaycanda, hətta cənubi Qafqaz regionunda polimer örtüklü rəngli metal rulonların yeganə istehsalçısıdır. Burada istehsal olunan rəngli rulonlar və dam örtükləri beynəlxalq keyfiyyət standartlarına ən yüksək səviyyədə cavab verməkdədir.
