Görkəmli ictimai-siyasi və dövlət xadimi Ümummilli Lider Heydər Əliyevin anadan olmasının 100 illik yubileyinə həsr olunan silsilə tədbirlər çərçivəsində Daxili İşlər Nazirliyinin (DİN) Polis Akademiyasında “Heydər Əliyev və müasir Azərbaycan” adlı respublika elmi-praktik konfransı keçirilib.
Rezonans.az xəbər verir ki, əvvəlcə Ulu Öndər Heydər Əliyevin abidəsi önünə əklil və gül dəstələri qoyulub, ölkəmizin ərazi bütövlüyü uğrunda aparılan mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad olunub.
Tədbirdə açılış nitqi ilə çıxış edən DİN-in Polis Akademiyasının rəisi, polis general-mayoru Canpolad Daanov konfrans iştirakçılarını salamlayıb və onun işinə uğurlar arzulayıb.
Konfransda məruzəçi qismində iştirak edən Azərbaycan Respublikasının İnsan Hüquqları üzrə Müvəkkili (Ombudsman) Aparatının Beynəlxalq təşkilatlar və vətəndaş cəmiyyəti institutları ilə əməkdaşlıq şöbəsinin sektor müdiri Müqalib Mahmudov “Ulu Öndər Heydər Əliyev insan hüquqları sahəsində islahatların banisidir” mövzusunda çıxışı zamanı dahi şəxsiyyət Heydər Əliyevin rəhbərliyi ilə müstəqil Azərbaycanda hüquqi dövlət və vətəndaş cəmiyyəti quruculuğu, insan hüquqlarının inkişafı, eyni zamanda, müstəqil məhkəmədənkənar hüquq müdafiə mexanizmi olan Ombudsman təsisatının yaradılması sahəsində həyata keçirilmiş genişmiqyaslı islahatlar barədə ətraflı məlumat verib.
Tədbirin sonunda Ümummilli Lider Heydər Əliyevin həyat və fəaliyyəti ilə bağlı videoçarx nümayiş etdirilib.
