Milli Məclisin İranla parlamentlərarası əlaqələr üzrə işçi qrupu üzvlərinin İran İslam Respublikası İslam Şurası Məclisinin üzvləri ilə görüşü keçirilib.
Rezonans.az xəbər verir ki, İranla parlamentlərarası əlaqələr üzrə işçi qrupunun üzvü Cavanşir Paşazadə İran nümayəndə heyətini salamlayaraq, ölkələrimiz arasında əlaqələrin inkişafından söhbət açıb. O, bu günlərdə Azərbaycanın Qarabağ bölgəsində Ermənistan silahlı qüvvələri tərəfindən törədilmiş təxribatlara cavab olaraq, həyata keçirilən antiterror tədbirləri barədə danışıb, bu tədbirlər nəticəsində həlak olanlara rəhmət diləyib.
Deputat ölkəmizin regionda sülhə, əmin-amanlığa önəm verdiyini, dövlətlər arasında dostluq münasibətlərinin inkişafında maraqlı olduğunu söyləyib. O, İranla müxtəlif istiqamətlərdə, o cümlədən iqtisadi, ticari, logistika sahələrində əlaqələrin genişləndirilməsinin əhəmiyyətindən danışıb, xalqlarımızın eyni tarixə, dinə, mədəniyyətə malik olduğunu deyib.
Ölkələrimizin parlamentləri arasındakı münasibətlərə toxunan Cavanşir Paşazadə bu əlaqələrin inkişafında qarşılıqlı səfərlərin və parlament dostluq qruplarının əhəmiyyətindən danışıb.
İranla parlamentlərarası əlaqələr üzrə işçi qrupunun üzvü, Qərbi Azərbaycan İcmasının sədri Əziz Ələkbərov Azərbaycanla İran arasında əlaqələrin dərin tarixi köklərə malik olduğunu qeyd edib. O, azərbaycanlıların Ermənistandan deportasiya edildiyini, orada azərbaycanlılara aid tarixi, mədəni abidələrin məhv edildiyini diqqətə çatdırıb. Deputat rəhbərlik etdiyi icma tərəfindən bununla bağlı mötəbər beynəlxalq təşkilatlara müraciətlər ünvanlandığını, hazırda Qərbi Azərbaycana Qayıdış Konsepsiyası əsasında Ermənistan ərazisindən qovulmuş azərbaycanlıların öz yurdlarına təhlükəsiz şəkildə qayıtmasını təmin etmək istiqamətində addımların atıldığını bildirib.
İran parlamentinin üzvləri Zahedi Mohəmməd Mehdi, xanım Paşayi Bəhram Məsumə, Əlizadə Əli səmimi görüşə görə təşəkkürlərini ifadə ediblər, Azərbaycan və İranın ortaq tarixi və mədəni dəyərlərə malik olduğunu söyləyiblər. Qonaqlar İranın Azərbaycanla müxtəlif sahələrdə daha sıx əməkdaşlığın inkişafında maraqlı olduğunu, iqtisadi sahədə əlaqələrin genişləndirilmləsi üçün geniş potensial imkanların mövcudluğunu qeyd ediblər.
İranlı deputatlar ölkələrinin Azərbaycanın ərazi bütövlüyünü daim dəstəklədiyini bildirərək, Qarabağın Azərbaycan torpağı olduğunu vurğulayıblar, öz ürək sözlərini söyləyiblər.
Söhbət zamanı dövlətlərarası münasibətlərin möhkəmləndirilməsi, parlamentlər arasında əlaqələrin inkişafı, bir sıra digər qarşılıqlı maraq doğuran məsələlər ətrafında fikir mübadiləsi aparılıb.
Görüşdə İran Xarici İşlər Nazirliyinin nümayəndəsi Həsəni Rıza, İranın Azərbaycandakı səfirliyinin təmsilçisi Ağayi Müsəvi Məliki və digər rəsmi şəxslər iştirak ediblər.
