Azərbaycan-Misir əlaqələri bu gün sürətlə inkişaf edir. Qeyd edək ki, bu əlaqələrin kifayət qədər qədim tarixi kökləri var. Blə ki, hələ sovet dönəmində Azərbaycanla Misir arasında mehriban dostluq əlaqələri mövcud olub.
Ölkəmiz müstəqilliyini bərpa etdikdən sonra bu əlaqələr keyfiyyətcə yeni səviyyəyə yüksəlib. Misir Ərəb Respublikası 1991-ci il dekabrın 26-da Azərbaycanın müstəqilliyini tanıyıb. 1993-cü ildə qarşılıqlı diplomatik əlaqələrin yaradılması haqqında protokola əsasən Misirin Bakıda, 1994-cü ilin yanvarında isə Azərbaycanın Qahirədə səfirlikləri açılıb. Təqdirəlayiq haldır ki, Ermənistan-Azərbaycan münaqişəsinin həlli məsələsində Misir Azərbaycanın ərazi bütövlüyünü həmişə dəstəkləyib və üzv olduğu beynəlxalq təşkilatlarda ədalətli mövqeyini daim müdafiə edib. Birmənalı olaraq deyə bilərik ki, Ölkə Prezidenti cənab İlham Əliyevin cari ilin 7 iyun tarixində Misirə etdiyi rəsmi səfər ölkələrimiz və xalqlarımız arasında əməkdaşlıq və dostluq əlaqələrinin inkişafına güclü təkan verəcək. Dövlət başçımızın iyunun 8-də Qahirədə mətbuata verdiyi bəyanatında da qeyd olunur ki, ölkələrimiz arasındakı siyasi dialoq müntəzəm xarakter daşıyır. Həmçinin Azərbaycan və Misir Prezidentlərinin bütün beynəlxalq məsələlərdə fikirləri üst-üstə düşür. Hər iki ölkə beynəlxalq təşkilatlar çərçivəsində fəal çalışır, o cümlədən BMT, Qoşulmama Hərəkatı, İslam Əməkdaşlıq Təşkilatı çərçivəsində fəal əməkdaşlıq olunur, habelə İslam həmrəyliyinin gücləndirilməsi istiqamətində birgə səylər göstərilir. Cənab Prezident öz çıxışında bu məqamı da qeyd etdi ki, Misirin dəstəyi ilə Azərbaycan dörd il ərzində Qoşulmama Hərəkatına sədrlik etmişdir. Bu sədrliyin nəticəsində Hərəkat daha böyük imkanlara malik olmuşdur. Azərbaycan Prezidenti növbəti dəfə prinsipial mövqedən çıxış edərək bildirdi ki, Fələstin-İsrail münasibətlərinin tənzimlənməsi və müstəqil Fələstin Dövlətinin yaradılması ölkəmizin Qoşulmama Hərəkatına sədrliyi dövründə hər zaman diqqət mərkəzində olub və bu məsələdə Azərbaycanın mövqeyi birmənalıdır - müstəqil Fələstin Dövləti qurulmalıdır, Şərqi Qüds onun paytaxtı olmalıdır. Qəzzada davam edən müharibə dayandırılmalıdır və bütün məsələlər danışıqlar yolu ilə həll olunmalıdır. Daha sonra cənab Prezident İlham Əliyev Azərbaycan və Ermənistanın öz dövlət sərhədlərini müəyyənləşdirmək işində müəyyən uğurlara nail olduqlarını diqqət mərkəzinə çəkib. Qeyd olunub ki, danışıqlar prosesində irəliləyiş üçün yaxşı imkanlar var. Artı iki ilə yaxındır ki, Azərbaycan-Ermənistan şərti sərhədində sakitlikdir, heç bir atəşkəs pozuntusu müşahidə edilmir. Azərbaycan keçən ilin sentyabr ayında öz dövlət suverenliyini və ərazi bütövlüyünü tam bərpa etmişdir. Bu yaxınlarda isə Azərbaycanın Qazax rayonunun otuz ildən çox müddət ərzində işğal altında olmuş dörd kəndi danışıqlar yolu ilə Azərbaycana geri qaytarılmışdır. Əlbəttə ki, bütün bunlar Ermənistan ilə münasibətlərin normallaşdırılması yolunda önəmli amil olacaqdır.
Nihad Pənahov,
YAP Tovuz rayon təşkilatının sədri
