Hər bir millətin gələcəyi onun bu gün atdığı addımlarla formalaşır. Tarix boyu inkişaf etmiş xalqlara baxdıqda görürük ki, onların uğurunun əsas səbəbi güclü təhsil sistemi, ədalətli idarəetmə və elmi tərəqqi olub. Təhsil təkcə fərdi bilik və bacarıqları artırmır, həm də bütöv bir cəmiyyətin düşüncə tərzini, iqtisadi və sosial rifahını müəyyənləşdirir.
Lakin təkcə təhsil almaq kifayət deyil; onun keyfiyyəti və ədalət prinsipləri də önəmlidir. Şəffaf və obyektiv təhsil sistemi bilik və bacarıqlara əsaslanan bir cəmiyyət yaradır və bu da millətin tərəqqisinə zəmin yaradır. Əgər təhsil sahəsində korrupsiya, qeyri-obyektivlik və haqsızlıq hökm sürərsə, cəmiyyətin inkişafı ləngiyir, savadlı və bacarıqlı insanların sayı azalır.
Bir millətin inkişafı təhsil, elm, iqtisadiyyat, milli dəyərlər, hüquqi sistem və vətəndaş fəallığından asılıdır. Təhsilli insan resursları olmadan güclü iqtisadiyyat, innovasiya və sosial rifah mümkün deyil. Təhsil fərdlərə tənqidi düşünməyi, problemləri həll etməyi və yeniliklər yaratmağı öyrədir. Güclü təhsil sistemi olan ölkələrdə insanlar daha yaradıcı və təşəbbüskar olur, iqtisadiyyat inkişaf edir, vətəndaşlar cəmiyyətə daha çox töhfə verir.
Bununla yanaşı, güclü iqtisadiyyat, qanunun aliliyi və milli dəyərlərin qorunması da bir millətin tərəqqisində mühüm rol oynayır. Lakin bu amillərin hər biri təhsillə bağlıdır. Maarifli vətəndaşlar hüquq sisteminin düzgün işləməsinə nəzarət edə, iqtisadi sahədə innovasiyalar edə və milli kimliklərini daha yaxşı qoruya bilərlər.
Bir millətin gələcəyi yalnız hökumət və liderlərin deyil, hər bir vətəndaşın əlindədir. Hər kəs öz sahəsində məsuliyyətli olmalı, bilik və bacarıqlarını millətin inkişafına yönəltməlidir. Xüsusilə gənclərin fəallığı və milli şüurun güclü olması ölkənin gələcəyinin parlaq olmasını təmin edir. Təhsilə, şəffaflığa və bilik üzərində qurulmuş cəmiyyətə yatırım edən millətlər daim inkişaf edəcək və gələcəyini daha güclü quracaqdır.
Xoşqədəm Xudiyeva
