Azərbaycan Respublikasının Prezidenti İlham Əliyev, Vietnam News Agency-ə verdiyi geniş müsahibədə Azərbaycanın beynəlxalq siyasətini, ikitərəfli əlaqələri və qlobal məsələlərə yanaşmalarını detallı şəkildə müzakirə edib. Müsahibə, Azərbaycanın yalnız regional deyil, həm də beynəlxalq miqyasda güclənən təsirini və Vyetnamla olan dostluq əlaqələrinin inkişafını təhlil edir. Prezident Əliyev, həmçinin Azərbaycanın enerji siyasəti, iqtisadiyyatın diversifikasiyası, təhlükəsizlik məsələləri və mədəni əlaqələr üzrə aparıcı mövqeyini vurğulayıb.
2025-ci il mayın əvvəlində Azərbaycan Respublikasının Prezidenti İlham Əliyevin Vyetnamın nüfuzlu “Vietnam News Agency” informasiya agentliyinə verdiyi müsahibə, iki ölkə arasında artan siyasi dialoqun bariz nümunəsi kimi yadda qaldı. Prezident müsahibədə Vyetnam Sosialist Respublikası Kommunist Partiyasının Mərkəzi Komitəsinin Baş katibi cənab To Lamın Azərbaycana gözlənilən səfərini xüsusi vurğulayaraq, bu mühüm diplomatik hadisənin münasibətlərə yeni nəfəs verəcəyini və əməkdaşlığın daha fəal mərhələyə keçidini təmin edəcəyini bəyan etdi. Vyetnam liderinin səfəri, ilk növbədə, Azərbaycanla Vyetnam arasında strateji dialoqun möhkəmləndirilməsi baxımından xüsusi əhəmiyyət daşıyır. Bu səfər yalnız protokol xarakteri daşımır, eyni zamanda konkret əməkdaşlıq sahələrinin dərinləşdirilməsi üçün real addımların atılacağı gözlənilir. İki ölkənin liderləri arasında baş tutacaq görüşlərdə siyasi, iqtisadi, humanitar, enerji, təhsil və digər sahələri əhatə edən yeni sənədlərin imzalanması və qarşılıqlı fəaliyyət mexanizmlərinin formalaşdırılması planlaşdırılır. Dostluq və tərəfdaşlıq ənənələrinə əsaslanan əlaqələrin möhkəmlənməsi kontekstində baş tutan bu səfər dövlətlərarası münasibətlərin strateji xarakter almasına şərait yaradıb. Rəsmi görüşlərdə aparılan müzakirələr, imzalanan sənədlər və verilən bəyanatlar iki ölkə arasında davamlı, sistemli və çoxşaxəli əlaqələrin qurulmasına yönəlmiş ortaq iradənin nümayişi kimi tarixi əhəmiyyət daşıyır. İki ölkənin liderləri tərəfindən imzalanmış “Azərbaycan Respublikası ilə Vyetnam Sosialist Respublikası arasında Strateji Tərəfdaşlığın qurulması haqqında Birgə Bəyanat” dövlətlərarası münasibətlərin keyfiyyətcə yeni müstəviyə qədəm qoyduğunu təsdiqləyir. Bu, qarşılıqlı fəaliyyətin siyasi-hüquqi bazasının möhkəmləndirilməsi baxımından önəmli addımdır. Prezident İlham Əliyevin vurğuladığı kimi, imzalanmış sənədlər arasında bir çox istiqamətlər üzrə sənədlər var: “Apardığımız danışıqlar və əldə edilmiş razılaşmalar deməyə əsas verir ki, biz qarşılıqlı əməkdaşlıq istiqaməti üzrə çox ciddi addım atmışıq. Vyetnam Kommunist Partiyasının Baş katibinin Azərbaycana dövlət səfəri çərçivəsində bu sənədlərin imzalanması, əlbəttə ki, onların əhəmiyyətini daha da artırır”. Prezident İlham Əliyev, Azərbaycanın beynəlxalq hüquqa, həmçinin münaqişələrin sülh yolu ilə həllinə sadiq olduğunu bildirib. Vyetnamın da bu yanaşmanı dəstəklədiyini qeyd edib. O, həmçinin, hər iki ölkənin müxtəlif beynəlxalq təşkilatlarda, xüsusən də BMT-də bir-birinin mövqeyini dəstəkləyəcəyinə inandığını qeyd edib. Prezident Əliyev, Azərbaycanın Vyetnamla siyasi və diplomatik əməkdaşlığın daha da dərinləşəcəyinə ümid etdiyini bildirib.İlham Əliyev, müsahibəsində Azərbaycanın Vyetnam ilə mədəni əlaqələrinin gücləndirilməsi zərurətini də qeyd edib. O, hər iki ölkə arasında təhsil, mədəniyyət və turizm sahələrində əməkdaşlığın artmasının vacib olduğunu vurğulayıb. Azərbaycan, öz mədəniyyətini və tarixini tanıtmaq üçün müxtəlif beynəlxalq tədbirlər təşkil edir və Vyetnam ilə bu sahədə daha sıx əməkdaşlıq etməyə hazırdır. Bu səfərin daha bir mühüm aspekti beynəlxalq təşkilatlar çərçivəsində əməkdaşlığın koordinasiyasıdır. Azərbaycan və Vyetnam BMT və Qoşulmama Hərəkatı kimi beynəlxalq platformalarda bir-birini dəstəkləyən ölkələrdir. Qlobal çağırışlara qarşı birgə mövqe sərgiləmək və çoxtərəfli formatlarda qarşılıqlı dəstəyi davam etdirmək səfərin gündəliyində duran mühüm məsələlərdəndir. Azərbaycan və Vyetnam beynəlxalq müstəvidə də geniş əməkdaşlıq potensialına malikdir. BMT, Qoşulmama Hərəkatı və digər çoxtərəfli platformalarda göstərilən qarşılıqlı dəstək iki ölkənin qlobal və regional sabitliyə verdiyi töhfəni nümayiş etdirir. Müxtəlif beynəlxalq təşəbbüslərdə birgə iştirak, ortaq maraqların müdafiəsi və multilateral diplomatiyada koordinasiyanın artırılması gələcək perspektivlər üçün mühüm zəmin yaradır. Vyetnam lideri To Lamın Bakıya səfəri ikitərəfli münasibətlərin inkişafına real töhfə verən əlamətdar hadisədir. Bu səfər çərçivəsində əldə olunmuş razılaşmalar uzunmüddətli tərəfdaşlıq üçün strateji yol xəritəsinin formalaşdırılmasını nəzərdə tutur, həmçinin Azərbaycan ilə Vyetnam arasında qarşılıqlı anlaşma və hörmət prinsiplərinə əsaslanan dostluq münasibətlərinin möhkəmləndirilməsinə xidmət edir. Hər iki ölkə qarşıda duran hədəfləri yerinə yetirmək və ikitərəfli münasibətləri daha yüksək səviyyəyə çatdırmaq əzmindədir.
Kamran Qasımov
YAP Tovuz rayon təşkilatının məsləhətçisi
