13-16 iyul 2021-ci ildə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, Elektron Hökumətin İnkişafı Mərkəzi, Asan radio 100 FM-in təşkilatçılığı və “PAŞA Holdinq”in sponsorluğu ilə 3-cü “Rəqəmsal Jurnalistikaya doğru” proqramı çərçivəsində seminarlara yekun vurulub.
Bakı şəhərinin Yasamal rayonundakı 3 saylı Asan Xidmət Mərkəzindəki “Asan Təlim Mərkəzi”ndə keçirilən proqrama informasiya agentlikləri, qəzetlər və informasiya portallarında çalışan 22 iştirakçı qatılmışdı.
Elektron Hökumətin İnkişafı Mərkəzinin Rəqəmsal Kommunikasiyalar şöbəsinin rəhbəri Xəyalə Fətullayeva açılış və təqdimetmə moderatoru qismində proqramın davam etdiyi müddətdə layihənin məqsəd və vəzifələri, spikerlər, həmçinin gələcək perspektivləri barədə məlumat verirdi.
13 iyulda Asan Radionun direktoru Emin Musəvi “Ənənəvi mediadan rəqəmsal mediaya” və ADA Universitetinin Media və kommunikasiyalar üzrə mühazirəçisi Şəfəq Mehrəliyeva interaktiv prezentasiyalarla müşayiət olunan məruzələr təqdim etdilər.
“Media nə üçündür?”, “Medianın texnoloji təkamülü”, “Rəqəmsal jurnalistika”, “Rəqəmsal dövrdə yeni media və ictimaiyyətlə əlaqələr”, “Ənənəvi mediadan rəqmsal mediaya keçid”, “Əməkdaşlıq jurnalistikası”, “Qısa məzmunda obyektivlik zərurəti”, “Ənənəvi və sosial mediada jurnalistika”, “DATA analitika”, “Crossplatform”, “Mediada innovativ hallar”, “Fakt yoxsa fikir?”, “Güvənli resurslardan məlumat almağın əhəmiyyəti”, “Media etikası” və d. aktual məsələlərin işıqlandırıldığı məruzələrin yekununda maraqlı diskussiyalar edildi.
Emin Musəvi Asan Radio 100 FM studiyasındakı iş prosesi barədə iştirakçıları məlumatlandırdı.
14 iyul proqramında Vətəndaşlara Xidmət və Sosial İnnovasiyalar üzrə Dövlət Agentliyinin “İctimaiyyətlə əlaqələr” şöbəsinin müdir müavini Sona Tağıyeva “Sosial medianın jurnalistikada istifadəsi” adlı təqdimatla çıxış etdi. Spikerin məruzəsində “Sosial mediada düzgün məzmunun yaradılması və onun düzgün idarəsinin jurnalistikada rolu”, “Sosial mediada hədəf kütlə seçimi və hesabların düzgün idarəsi”, “Rəqəmsallıq və yeni media jurnalistikası”, “Faydalı sosial media alətləri” mövzuları yer almışdı.
Digər spiker – TexnoBloger. Techno.az saytının yaradıcısı Fərid Pərdəşünas “Blogerliyin əsasları” adlı təqdimatında “Bloq yaratmaq üçün nədən başlamalı?”, “Yeni kontent formalaşdırmaq üçün motivasiya necə tapmalı?”, “Oxucuları daim maraqda saxlamanın yolları”, “Blogerlik sənət yoxsa hobbidir?” suallarına cavablar işıqlandırdı.
15 iyul proqramında çıxış edən Elektron Hökumətin İnkişafı Mərkəzinin direktoru Fariz Cəfərovun “Qlobal Rəqəmsallaşmada Azərbaycan” mövzusunda interaktiv məruzəsində “Azərbaycanda e-xidmətlərin inkişaf mərhələləri”, “Azərbaycanda elektron hökümət sahəsində mövcud vəziyyət və gələcəyə baxış”, “EHİM və Azərbaycanın Süni İntellekt Bürosunda təmsilçiliyi” və d. məsələlərlə əlaqədar fikirlər şərh edildi.
Daha sonra məruzə edən – Elektron Hökumətin İnkişafı Mərkəzinin “Tərəfdaşlarla iş və Kommunikasiyalar” departamentinin müdiri Soltan Bayramovun “myGov elektron hökümət portalı” mövzusunda interaktiv məruzəsində qeyd edilən portalın məqsədi, funksiyaları, üstünlükləri, proqrama giriş, qeydiyyat və təhlükəsizlik qaydaları, həmçinin elektron xidmətlər və real nümunələr haqqında məlumatlar verildi.
Elektron Hökumətin İnkişafı Mərkəzinin layihə rəhbərləri – Ruslan Mürsəlov “e-Gov.az portalı” və Tural Həsənov “ASAn Login” vahid giriş sistemi” adlı məruzələrlə çıxış etdilər.
15 iyulda Elektron Hökumətin İnkişafı Mərkəzinin layihə rəhbərləri ASAN xidmətin təqdim etdiyi layihələr barədə interaktiv məlumatlar təqdim edilmişdir. Aqşin İbrahimov “ASAN finans”, Müşviq İsmayılov “ASAN ödəniş”, Nərmin Hacıyeva “ASAN Viza”, Nərgiz Rəsulova “Elektron Kənd Təsərrüfatı İnformasiya Sistemi” adlı interaktiv təqdimatlarında belə layihələrin əhəmiyyəti və onlardan istifadə yolları izah edildi.
Proqramın ikinci qismində məruzə edən İNNOLAND İnkubasiya və Akselerasiya Mərkəzinin Startaplarla iş üzrə eksperti Tengiz Ağakişiyevin “Startaplar” adlı məruzəsində “Startap nədir? Azərbaycanda bu sahədə fəaliyyət”, “Kimlər startapçı ola bilər”, “İdeyadan startapa hansı addım və proseslər lazımdır?”, “Startap layihələrinə necə investorlar cəlb etmək olar”, “Startapın uğurlu olması üçün nələrə əməl olunmalıdır” suallarına cavablar əks edilmişdi.
Elektron Hökumətin İnkişafı Mərkəzinin “Proseslərin analizi və auditi” üzrə müşavir, “Süni intellekt” üzrə doktorant Günay Kazımzadənin “Süni intellekt” adlı məruzəsində “Süni intellekt nədir və onun rəqəmsal dünyada rolu”, “Hansı xidmətlərdə süni intellekt texnologiyasından istifadə edilir”, “Azərbaycanda süni intellektin tətbiqi və gələcək planlar”, “EHİM-in süni intellekt həlləri” məsələlərinin həlli barədə izahlar təqdim edildi.
Bütün spikerlərin məruzələri maraqlı diskussiyalarla yadda qaldı. Təcrübə nəticələrin əks edildiyi mühazirələrdə müasir rəqəmsallaşma və jurnalistikada aktuallıq kəsb edən suallar və onların həlli yolları tədqiq və təhlil edilmiş, maraqlı təkliflər səsləndirilmişdir.
Seminarların son günündə ümumi mükafat fondu 2200 AZN təşkil edən müsabiqəyə start verilib. Müsabiqə çərçivəsində iştirakçılar tərəfindən aşağıdakı mövzular üzrə araşdırmalar hazırlanaraq kütləvi informasiya vasitələrində dərc olunmalıdır:
– “ASAN ödəniş” portalının funksionallığı və portala yeni xidmətlərin gətirilməsi üçün təkliflər;
– “ASAN Finans”ın vətəndaş və biznes qurumları üçün üstünlükləri;
– Bölgələrdə rəqəmsal savadlılığın artırılmasının həlli yolları;
– Özəl sektorda vətəndaşların işlərini rahatlaşdıracaq həllər;
– Mövcud elektron hökumət həlləri, onların gündəlik həyatımızda rolu və faydaları;
– Azərbaycanda tələbatı yüksək olan xidmətlərin elektronlaşdırılması;
– Elektron hökumət quruculuğunda istifadəçi (vətəndaş) iştirakının təmin edilməsi yolları;
– Rəqəmsal hökumətdə süni intellektin tətbiqi üzrə uğurlu nümunələr və ölkə üzrə təkliflərin verilməsi.
Hazırlanmış materiallar proqramın münsiflər heyəti tərəfindən təhlil edilərək qiymətləndiriləcək. Birinci, ikinci və üçüncü yerin qalibi proqramın mükafatlandırma mərasimində elan olunacaq.
“Rəqəmsal Jurnalistikaya doğru” proqramlarının əsas məqsədi kütləvi informasiya vasitələri nümayəndələrinin İKT, elektron dövlət xidmətləri, rəqəmsal həllər haqqında məlumatlılığını daha da artırmaq, eləcə də elektron xidmətlər sahəsində əhalinin bilgilərini daha da genişləndirməkdir.
22 iyul – Milli Mətbuat Gününə həsr olunan proqramı uğurla başa vuran iştirakçılara sertifikatların təqdim edilməsi nəzərdə tutulub.
Qeyd edək ki, ötən il bu proqramın ilk iki dalğası reallaşdırılıb və uğurla nəticələnib.
Aygün Məmmədova
