İsrail hakimiyyəti ABŞ-yə İranın prezident Donald Trampa qarşı sui-qəsd hazırladığına dair kəşfiyyat məlumatları təqdim edib.
Rezonans.az xəbər verir ki, bu barədə "The Wall Street Journal" qəzeti mənbələrə istinadən məlumat yayıb.
Bu məlumat ABŞ-nin mövqeyinin sərtləşməsinə və İranla münaqişənin gərginləşməsinə səbəb ola bilər.
İsrailin Baş naziri Binyamin Netanyahu İrana qarşı hərbi əməliyyatların aparılmasını müdafiə etməyə davam edir. Tramp isə bu yaxınlara qədər gərginliyin iqtisadi nəticələrindən qorxaraq diplomatik həllin tərəfdarı olaraq qalırdı.
Xatırladaq ki, ABŞ və İsrail 28 fevralda İrana qarşı müharibəyə başlayıblar. Hava hücumları nəticəsində İranın Ali Lideri Əli Xamenei də həlak olub. İyun ayında Vaşinqton və Tehran Livan da daxil olmaqla, bütün cəbhələrdə hərbi əməliyyatların dərhal dayandırılmasını nəzərdə tutan anlaşma memorandumu imzalayıblar.
Daha sonra İsveçrənin Bürgenştok şəhərində Doha və İslamabadın vasitəçiliyi ilə ABŞ və İran arasında memorandumun həyata keçirilməsi ilə bağlı danışıqlar aparılıb. Qətər və Pakistanın danışıqların birinci mərhələsindən sonra birgə bəyanatında qeyd edildiyi kimi, İran və ABŞ nümayəndələrinin iştirakı ilə keçirilən görüş müsbət və konstruktiv atmosferdə keçib, gələcək texniki məsləhətləşmələr üçün əsasın yaradılması da daxil olmaqla, təşviqedici irəliləyiş əldə edilib.
Lakin 8 iyul gecəsi ABŞ İranı Hörmüz boğazı ilə bağlı əldə edilmiş razılaşmaların şərtlərini pozmaqda ittiham edərək, İrana qarşı hücumları bərpa edib.
Qeyd edək ki, İran 6 iyulda Hörmüz boğazında 2 ticarət gəmisinə hücum etmişdi.
