8 Mart dünyanın bir çox yerində olduğu kimi, ölkəmizdə də Beynəlxalq Qadınlar Günü kimi qeyd edilir. Qadın hərəkatının tarixinə nəzər salsaq, bu hərəkat 1850-ci illərdən etibarən ABŞ-da başlamışdır. 1910-cu ildə Klara Setkin 8 martın dünya qadınlar günü kimi qeyd edilməsinə nail olmuşdur. 1977-ci ildə BMT də bu günü qadınlar günü kimi rəsmiləşdirmişdir. Ölkəmizdə 8 Mart Beyəlxalq Qadınlar Günü kimi qeyd edilməklə yanaşı, həm də qeyri-iş günü olan bayram günüdür.
Qadın hərəkatının başlıca məqsədi hər zaman qadınların kişilərlə bərabər hüquqlara sahib olması üçün mübarizə aparmaq olmuşdur. Çox qürurverici haldır ki, Azərbaycan bir çox məsələlərdə Şərqdə ilk olduğu kimi, qadın hüquqlarının tanınması və qorunmasında, gender bərabərliyinin təmin edilməsində, qadınların kişilərlə bərabər ictimai-siyasi həyatda iştirakına şərait yaradılmasında, qadınlara seçmək və seçilmək hüququ verilməsində də ilk ölkədir. Azərbaycan qadınları Şərqin ilk demokratik respublikası olan Azərbaycan Xalq Cümhuriyyəti dövründə seçib- seçilmək hüququ qazanaraq ölkəmizin ictimai-siyasi həyatında iştirak etməyə başlamışdır.
Azərbaycan həm də, müsəlman Şərqində qadınları maarifləndirən, qadınları təhsilə cəlb edən ilk ölkədir. 1901-ci ildə Bakıda Hacı Zeynalabdin Tağıyevin təşəbbüsü və dəstəyi ilə açılmış qızlar məktəbi müsəlman Şərqində ilk dünyəvi qızlar məktəbi idi. Bununla da, Azərbaycanda dünyəvi qadın təhsilinin əsası qoyulmuş və ilk qızlar məktəbi tezliklə qızların təhsil ala biləcəyi digər məktəblərin də açılmasına öncülük etmişdir. XX əsrin əvvəllərində müsəlman ölkələrində qızların təhsil almadığı bir vaxtda Azərbaycanda valideynlər qız uşaqlarını çəkinmədən məktəbə göndərməyə başlamışdır.
Müstəqilliyimizi bərpa etdikdən sonra Azərbaycanda qadın siyasətinin əsasını qoyan şəxs isə Ulu Öndərimiz Heydər Əliyev olmuşdur. İlk öncə qeyd edim ki, Ulu Öndər hər şeydən əvvəl qadın şəxsiyyətinə böyük hörmətlə yanaşırdı və məhz buna görə də ölkədə qadınların kişilərlə bərabər fəal vətəndaşlıq mövqeyi sərgiləməsini, ölkənin ictimai-siyasi həyatının bütün sahələrində qadınların da yer almasını istəyirdi. Bunun nəticəsidir ki, qadınlarımız milli dövlət quruculuğu prosesinin fəal iştirakçısına çevrilmiş, ölkəmizin sosial-iqtisadi, mədəni, idman, elm-təhsil, səhiyyə və bir çox başqa sahələrində fəal iştirak etmiş və dəyərli töhfələr vermişdir.
Azərbaycan qadınlarının ilk qurultayı da ölkəmizdə 1998-ci il sentyabrın 25-də məhz Ulu Öndərin təşəbbüsü ilə keçrilmiş, bu, dövlətimizin qadın siyasətinin tarixində mühüm hadisə olmuş və ən əsası qadın qurultaylarının keçirilməsi ənənə halını almışdır. 1998-ci ildən etibarən hər beş ildən bir Azərbaycan qadınlarının qurultayları keçirilir. Bu qurultaylarda dövlət qadın siyasətinin mühüm məsələləri müzakirə olunur və mühüm qərarlar qəbul edilir.
Bu gün də ölkəmizdə cənab Prezident İlham Əliyevin rəhbərliyi ilə qadın hüquqlarının qorunması, ölkənin tərəqqisində və inkişafında qadınların rolunun artması, cəmiyyətdə qadının rolunun gücləndirilməsi, gender siyasəti uğurla həyata keçirilir. Azərbaycan qadınları qanunvericilik, icra, məhkəmə, bir sözlə, dövlət hakimiyyətinin bütün strukturlarında, bələdiyyələrdə uğurla təmsil olunur, ictimai-siyasi, sosial-iqtisadi, idman-sağlamlıq elmi-mədəni sferalarda fəal iştirak edirlər. Qadın hüquqlarının qorunması ilə bağlı istər daxili qanunvericiliyimizin təkmilləşdirilməsi, istərsə də bu sahədə beynəlxalq əməkdaşlıq və beynəlxalq təşkilatların qadın hüquqlarının qorunması ilə bağlı sənədlərinin tanınması dövlət siyasətimizdə mühüm yer tutur.
Mən hüquqşünas kimi əminliklə qeyd edə bilərəm ki, Azərbaycanın Ailə Məcəlləsində, Mülki Məcəllədə, Cinayət Məcəlləsində və digər qanunlarımızda qadına qarşı şiddət və özbaşınalığın qarşısının alınması, qadın əməyinin kişilərlə bərabər qiymətləndirilməsi və lazımi məqamlarda hətta qadınlara müəyyən imtiyazlar verilməsi və digər bu kimi qadın hüquqlarının qorunması olduqca yaxşı tənzimlənir və bu sahədə qanunvericiliyi təkmiləşdirməyə daim davam edirik.
Azərbaycan həm də “Bərabər əməyə görə kişilərə və qadınlara bərabər haqq verilməsi haqqında”, “Analığın mühafizəsi haqqında”, “Əmək və məşğulluq sahəsində ayrı-seçkilik haqqında” və qadın hüquqlarının qorunmasına xidmət edən bir çox başqa konvensiyalara üzvdür və konvensiyaların tələbləri Azərbaycanda mükəmməl şəkildə təmin edilir.
Qeyd etdiyim kimi, qadınlar ölkəmizdə ictimai-siyasi həyatın bütün sahlərində aktiv iştirak edir, lakin ordu quruculuğunu xüsusi qeyd etmək istərdim. Qadınlarımız Azərbaycan Ordusunun bütün qoşun növlərində, xüsusi təyinatlı təhsil müəssisələrində, hərbi tibb ocaqlarında xidmət edirlər. Öz sədaqəti, qəhrəmanlığı, vəfası, müdrikliyi, qadın adını uca tutmağı ilə hər zaman seçilən qadınlarımızın bu gün də vətən qarşısında vəzifə borclarını şərəf və ləyaqətlə yerinə yetirmələri Azərbaycan qadının əsl ləyaqətli simasını bir daha təsdiq edir.
Ləyaqətli Azərbaycan qadının müasir dövrümüzdə ən böyük təcəssümü hər zaman cənab Prezidentimizin yanında olan, onunla çiyin-çiyinə işləyən, daim dəstək göstərən, ölkəmizin ictimai-siyasi, mədəni həyatında mühüm rol oynayan, tariximizi, mədəniyyətimizi, musiqimizi təbliğ edən, iştirak etdiyi tədbirlərdə, konfranslarda, dövlətimizi ən yüksək şəkildə təmsil edən Birinci vitse-prezident Mehriban xanım Əliyevadır. Azərbaycanın dünyada mədəniyyət carçısı, mültikulturalizm və tolerantlıq məkanı kimi tanınmasında, Azərbaycanın beynəlxalq brendə çevrilməsində Mehriban xanımın əməyi inkar olunmazdır. Birinci vitse-prezident kimi Mehriban xanım özünün peşəkarlığı, biliyi, idarəetmə qabiliyyəti ilə Azərbaycan tarixində qadın hərəkatının da yeni bir səhifəsini açmış, idarəetmədə qadınların rolunun artmasına dəstək olmuşdur.
Xalqımız hər zaman qadınlarımıza böyük hörmət və ehtiram bəsləmiş, xüsusən ana adını həmişə uca tutmuşdur. 8 mart Beynəlxalq Qadınlar Günü də ölkəmizdə hər zaman qadınlarımızın layiq olduğu kimi təmtəraqla keçirilmişdir. Hər il bayram günü ərəfəsində Azərbaycan qadınlarının bir qrupuna fəxri adlar verilir, onlar orden və medallarla təltif edilirlər, cənab Prezident şəxsən qadınlarımıza müraciət edərək onları təbrik edir. Bu il də möhtərəm Prezidentimiz bu gözəl ənənəni davam etdirərək qadınlarımızı bayram münasibəti ilə təbrik etmişdir. Cənab Prezident xüsusi olaraq qeyd emişdir ki, gözəlliyi, zərifliyi və nəcibliyi ilə seçilən Azərbaycan qadınları həmçinin hünər və igidlik göstərərək tariximizə parlaq səhifələr yazmışlar, onlar taleyüklü bütün sınaq anlarında həmişə cəmiyyətimizə əsl mənəvi dayaq olmuş, 44 günlük Vətən müharibəsindəki fədakarlıqları ilə bu gerçəyi bir daha sübuta yetirmişlər.
Mən də qadınlarımızı Beynəlxalq Qadınlar Günü münasibəti ilə təbrik edir, onlara bütün işlərində uğurlar arzulayıram. Əminəm ki, qadınlarımız əsrlədən bəri qoruyub saxladığımız ailə dəyərlərimizi, milli-mənəvi dəyərlərimizi bundan sonra da layiqincə davam etdirəcək, həmin dəyərlərə sadiq ruhda gənc nəslin yetişdirilməsində və ümumilikdə, ölkəmizin tərəqqisində öz töhfələrini əsirgəməyəcəklər.
Milli Məclisin Müdafiə, təhlükəsizlik və korrupsiya ilə mübarizə komitəsinin
sədri Ziyafət Əsgərov
