2020-ci ildə Azərbaycan Ordusu Qarabağ müharibəsində böyük zəfər qazandı, ərazi bütövlüyünü bərpa etdi. Lakin Vətən müharibəsi bitdikdən sonra erməni tərəfi regionda sülhün bərqərar olmasına mane olan təxribatlar törətməyə davam etdi. Bu təxribatlar Ermənistanın üçtərəfli bəyanatın şərtlərini pozmasına, xüsusilə də Azərbaycan ərazilərində yerləşdirilmiş qanunsuz erməni silahlı birləşmələrinin aktiv qalmasına səbəb oldu.
2022-ci ilin avqust ayında Ermənistan silahlı qüvvələri yenidən təxribatlara əl atdı. Avqustun 3-də Laçın istiqamətində yerləşdirilmiş erməni silahlı dəstələri Azərbaycan ordusunun mövqelərinə atəş açdı. Nəticədə, bir Azərbaycan hərbçisi şəhid oldu. Bu hadisə Azərbaycan üçün qırmızı xətt oldu və ölkənin cavab tədbirləri qaçılmaz oldu.
Bunun cavabı kimi Azərbaycan Silahlı Qüvvələri "Qisas" əməliyyatına başladı. 2022-ci il avqustun 3-də baş tutan bu əməliyyatın əsas məqsədi qanunsuz erməni silahlı dəstələrinin mövqelərini zərərsizləşdirmək və bölgədə sabitliyi bərpa etmək idi. Əməliyyat zamanı Azərbaycan Ordusu mühüm strateji yüksəklikləri ələ keçirdi və düşmənə ağır zərbələr vurdu.
"Qisas" əməliyyatı yalnız bir hərbi əməliyyat deyil, həm də Ermənistan tərəfinə ciddi bir xəbərdarlıq idi. Azərbaycan göstərdi ki, üçtərəfli bəyanatın şərtlərinə əməl edilmədiyi halda, hərbi güc yolu ilə regionda sabitliyi və təhlükəsizliyi təmin etmək iqtidarındadır. Bu əməliyyat Azərbaycanın post-müharibə dövründə də sülhün və sabitliyin təminatçısı olaraq mövqeyini gücləndirdi.
Beləliklə, "Qisas" əməliyyatı Azərbaycanın hərbi və diplomatik mövqeyinin daha da möhkəmlənməsinə səbəb oldu və antiterror əməliyyatlarına gedən yolda mühüm mərhələni təşkil etdi.
Allah bütün şəhidlərimizə rəhmət eləsin!
Sahilə Bayramlı
