ABŞ Azərbaycanın COP29-da sədrliyini yüksək qiymətləndirir. Azərbaycan Prezidenti İlham Əliyev ekologiya naziri Muxtar Babayev və xarici işlər nazirinin müavini Yalçın Rəfiyevin rəhbərliyi ilə güclü komanda təyin edib.
Rezonans.az xəbər verir ki, bu fikirləri ABŞ Prezidentinin beynəlxalq iqlim siyasəti üzrə xüsusi müşaviri Con Podesta azərbaycanlı jurnalistlər üçün keçirdiyi brifinqdə deyib.
"Biz Azərbaycanın COP29-a ev sahibliyi etməyə razılıq verdiyi bir ildən az müddət əvvəl prioritetləri razılaşdırmışıq", - o bildirib.
Xüsusi müşavir Azərbaycan Prezidenti İlham Əliyev tərəfindən qəbul edildiyini diqqətə çatdırıb: “Biz bir sıra məsələlər, o cümlədən COP29-un uğurla keçirilməsinə hazırlıq, eləcə də Ermənistanla uzunmüddətli və layiqli sülh sazişinin bağlanması üçün davam edən səylər barədə fikir mübadiləsi apardıq”.
Onun sözlərinə görə, COP29-un keçirilməsi iqlim dəyişikliyinin təsirlərinin bütün dünyada müşahidə edildiyi kritik onillikdə kritik mərhələyə təsadüf edir: “Onlar açıq şəkildə göstərdilər ki, həm istixana qazı emissiyalarını azaltmaq, həm də dayanıqlıq və uyğunlaşmaya sərmayə qoyuluşunu sürətləndirmək üçün daha çox iş görülməlidir”.
C.Podesta vurğulayıb ki, dünyada baş verən təbii kataklizmlər və onların təsirləri dünya ictimaiyyətinə təzyiq göstərərək onun irəliləməsi, COP29-un uğurlu olması üçün səy göstərməsi və xüsusilə bu konfransda əsas prioritet olan inkişaf etməkdə olan ölkələr üçün lazımi resursların təmin edilməsini tələb edir.
"Hazırda bütün dünyanın gözü Azərbaycandadır. Bir aydan sonra burada çoxlu sayda qonaq olacaq. Hesab edirəm ki, biz gələcək sədrliyin mükəmməl rəhbərliyi altında yaxşı irəliləyir və noyabrda uğurlu nəticə gözləyirik", - o qeyd edib.
