Azərbaycan xalqı tarix boyunca azadlıq və dövlətçilik uğrunda apardığı mübarizədə böyük əzmkarlıq, iradə və fədakarlıq nümayiş etdirmişdir. Əsrlər boyu yadelli istilalarına qarşı dayanan, milli kimliyini qoruyub saxlayan Azərbaycan xalqı, nəhayət ki, özünün müstəqil dövlətini qurmaq və onu inkişaf etdirmək şərəfinə nail olmuşdur. Bu yolun zirvəsi isə 2020-ci ildə əldə olunmuş böyük Qələbə
Milli Dövlətçiliyimizin Tarixi Zəfəri oldu.
Bu Zəfər təkcə hərbi uğur deyil, həm də siyasi müdriklik, milli birlik, dövlət və xalqın bir amal uğrunda birləşməsi nümunəsidir. 44 günlük Vətən müharibəsində Azərbaycan Ordusu Prezident, Ali Baş Komandan İlham Əliyevin rəhbərliyi ilə torpaqlarımızı azad edərək, illərlə davam edən işğala son qoydu. Bu Qələbə nəticəsində Azərbaycan yalnız ərazi bütövlüyünü bərpa etmədi, həm də dünya birliyinə milli gücünü, siyasi iradəsini və dövlət olaraq suverenliyini qorumaq əzmini nümayiş etdirdi.
Tarixi Zəfərin arxasında dayanan əsas amillərdən biri dövlətçilik ənənələrinin bərqərar olması və bu ənənələrin müasir dövrdə səmərəli şəkildə inkişaf etdirilməsidir. Ulu Öndər Heydər Əliyevin əsasını qoyduğu güclü dövlət modeli, Prezident İlham Əliyevin strateji idarəçiliyi ilə daha da möhkəmləndi. Ordu quruculuğu, iqtisadi inkişaf, diplomatik uğurlar və daxili siyasi sabitlik – bunlar Azərbaycanın bu Qələbəyə aparan yolunun əsas sütunlarıdır.
Bu Qələbə milli dövlətçiliyimizin təsdiqi, xalqın öz dövlətinə inamının və sevgisinin təntənəsidir. Əgər bir dövlətdə xalq, ordu və lider bir yumruq kimi birləşirsə, o dövlət məğlubedilməzdir. Məhz bu birliyin nəticəsində Azərbaycan işğala son qoydu və yeni tarix yazdı.
Zəfərdən sonra başlayan bərpa-quruculuq dövrü, işğaldan azad olunmuş torpaqlarda həyata keçirilən infrastruktur layihələri, “Böyük Qayıdış” konsepsiyası və sülh gündəliyi Azərbaycanın öz dövlətçiliyini nə dərəcədə möhkəm əsaslar üzərində qurduğunu bir daha təsdiqləyir.
2020-ci ilin Zəfəri Azərbaycan tarixinin yalnız bir epizodu deyil, dövlətçiliyimizin müasir çağda qazandığı ən böyük uğurdur. Bu Qələbə gənc nəsillərə və gələcək nəsillərə dövlətinə, xalqına və liderinə güvənməyi, milli dəyərlərə sahib çıxmağı öyrədir.
Milli dövlətçiliyimizin tarixi Zəfəri həm keçmişimizin qüruru, həm də gələcəyimizin zəmanətidir.
ƏLİ MUSA
REZONANS.AZ RƏHBƏRİ
