ABŞ-ın Vitse-prezidenti Cey. Di. Vensin Azərbaycana rəsmi səfəri və səfər çərçivəsində keçirilmiş yüksək səviyyəli görüşlər iki ölkə arasında münasibətlərin inkişafında mühüm mərhələ kimi dəyərləndirilir. Prezident İlham Əliyevin mətbuata bəyanatı isə Azərbaycan-ABŞ əməkdaşlığının hazırkı vəziyyətini, strateji mahiyyətini və gələcək perspektivlərini kompleks şəkildə ortaya qoyması baxımından xüsusi əhəmiyyət kəsb edir. Vitse-prezident Cey. Di. Vensin Azərbaycana səfəri, xüsusilə də Strateji Xartiyanın imzalanması kontekstində, ikitərəfli münasibətlərdə tarixi hadisə hesab edilir. Strateji Xartiya əməkdaşlığın hüquqi-institusional bazasını gücləndirir, prioritet istiqamətləri müəyyənləşdirir və uzunmüddətli tərəfdaşlıq üçün etibarlı çərçivə formalaşdırır. Səfər çərçivəsində aparılan müzakirələr siyasi, iqtisadi və təhlükəsizlik sahələrində əlaqələri yeni mərhələyə yüksəldərək, Azərbaycan-ABŞ münasibətlərinin dərin strateji məzmununu daha da gücləndirmişdir.
Amerika Birləşmiş Ştatlarının Vitse-prezidenti Cey. Di. Vensin Azərbaycana səfəri ilə əlaqədar mətbuata bəyanatında Prezident İlham Əliyev Azərbaycan və Ermənistan arasındakı mövcud münasibətlərdən bəhs etməklə yanaşı bildirdi ki, artıq Birləşmiş Ştatlarla Azərbaycan arasında münasibətlər tamamilə yeni mərhələyə qədəm qoyur. Amerika Birləşmiş Ştatları ilə Azərbaycan arasında Strateji Tərəfdaşlıq haqqında Xartiyanın imzalanması bunun əyani sübutudur. Prezident İlham Əliyev xatırlatdı ki, altı ay əvvəl Prezident Trampla Vaşinqtonda tarixi görüş və Strateji Tərəfdaşlıq haqqında Xartiyanın tərtib edilməsi üçün işçi qrupunun yaradılması haqqında sənədin imzalanması ikitərəfli əməkdaşlıq üçün yeni imkanlar yaratmışdır.
Səfər çərçivəsində imzalanan sənədlər və aparılan müzakirələr göstərdi ki, Bakı və Vaşinqton artıq regionda davamlı sülhün təmininə dair ortaq öhdəliklərini təsdiqləyiblər. ABŞ-ın yeni administrasiyası Azərbaycanın sülh gündəmini və iqtisadi təşəbbüslərini tam dəstəkləyir. Regionda sülh sahəsində əldə olunmuş nəticələrin gücləndirilməsi artıq sadəcə niyyət deyil, TRIPP kimi konkret investisiya və infrastruktur layihələri ilə möhkəmləndirilən reallıqdır.
Nəticə olaraq, Amerika Birləşmiş Ştatlarının Vitse-prezidenti cənab Cey Di Vensin Bakıya rəsmi səfəri və imzalanmış sənədlər Azərbaycan-ABŞ əlaqələrini klassik diplomatik münasibətlər çərçivəsindən çıxararaq, sarsılmaz bir strateji ittifaqa çevirir. Bu yeni mərhələ sadəcə iki dövlət arasında əməkdaşlıq deyil, həm də regionun gələcək taleyini müəyyən edən bir təhlükəsizlik və inkişaf arxitekturasıdır.
ABŞ eyni zamanda Azərbaycanın üzləşdiyi mina təhlükəsi və xüsusilə maliyyə dəstəyi, texnologiyaların ötürülməsi vasitəsilə ölkəmizdə humanitar minatəmizləmə sahəsində bacarıqların inkişafı istiqamətində əməkdaşlıq etmək niyyətindədir. Ölkəmizin beynəlxalq sülhməramlı səylərə verdiyi töhfələr də yüksək dəyərləndirilib. Müdafiə və təhlükəsizlik əməkdaşlığının əhatə dairəsinin, o cümlədən terrorçuluğa qarşı mübarizə sahəsində əməkdaşlığın genişləndirilməsi prioritet istiqamət kimi müəyyən edilib.
Emin Feyzizadə
YAP Tovuz rayon təşkilatının məsləhətçisi
