Azərbaycan xalqının müasir tarixində elə günlər vardır ki, həmin günlər təkcə bir təqvim hadisəsi deyil, bütöv bir xalqın taleyini müəyyənləşdirən dönüş nöqtəsi kimi yadda qalır. 15 İyun – Milli Qurtuluş Günü də məhz belə tarixi günlərdəndir. Bu tarix Azərbaycan dövlətçiliyinin qorunub saxlanılması, ölkənin parçalanmaq təhlükəsindən xilas edilməsi və müstəqil Azərbaycanın gələcək inkişaf yolunun müəyyənləşdirilməsi baxımından müstəsna əhəmiyyətə malikdir.
XX əsrin sonlarında müstəqilliyini yenidən bərpa edən Azərbaycan çox mürəkkəb və çətin sınaqlarla üz-üzə qalmışdı. Ölkədə siyasi qeyri-sabitlik hökm sürür, iqtisadi vəziyyət ağırlaşır, dövlət idarəçiliyində ciddi problemlər yaşanırdı. Ermənistanın Azərbaycana qarşı hərbi təcavüzü nəticəsində torpaqlarımız işğal edilir, daxildə isə hakimiyyət uğrunda mübarizə dövlətçiliyin əsaslarını sarsıdırdı. Belə bir zamanda xalqın gələcəyinə olan ümidləri azalır, ölkənin vətəndaş müharibəsinə sürüklənməsi təhlükəsi getdikcə artırdı.
1993-cü ilin iyun ayında yaranmış böhran vəziyyəti Azərbaycanı dövlət müstəqilliyini itirmək təhlükəsi ilə üz-üzə qoymuşdu. Xalq vəziyyətdən çıxış yolunu yalnız böyük siyasi təcrübəyə, zəngin dövlətçilik məktəbinə və xalqın etimadına malik olan Ulu Öndər Heydər Əliyevin hakimiyyətə qayıdışında görürdü. Məhz xalqın təkidli tələbi ilə Heydər Əliyev Bakıya dəvət olundu və 15 iyun 1993-cü ildə Azərbaycan Respublikası Ali Sovetinin sədri seçildi. Həmin gün Azərbaycanın qurtuluş yolunun başlanğıcı oldu.
Ulu Öndər Heydər Əliyevin siyasi hakimiyyətə qayıdışı ölkədə sabitliyin bərpasına, qanunçuluğun möhkəmlənməsinə və dövlət idarəçiliyinin təkmilləşdirilməsinə imkan yaratdı. Qısa müddət ərzində ölkədə daxili qarşıdurmaların qarşısı alındı, vətəndaş həmrəyliyi gücləndirildi və Azərbaycanın beynəlxalq nüfuzu artmağa başladı. Müstəqilliyimizin möhkəmləndirilməsi istiqamətində həyata keçirilən məqsədyönlü siyasət ölkənin inkişafı üçün etibarlı zəmin yaratdı.
Milli Qurtuluş Günü yalnız keçmişin xatirəsi deyil, həm də Azərbaycanın bu gün əldə etdiyi uğurların başlanğıc nöqtəsidir. Məhz həmin dövrdə müəyyən edilən strateji inkişaf kursu ölkəmizin iqtisadi, siyasi və hərbi cəhətdən güclənməsinə xidmət etdi. "Əsrin müqaviləsi"nin imzalanması, xarici investisiyaların cəlb olunması, dövlət institutlarının formalaşdırılması və beynəlxalq əlaqələrin genişləndirilməsi Azərbaycanın regionun aparıcı dövlətlərindən birinə çevrilməsinin əsasını qoydu.
Bu gün Azərbaycanın qazandığı bütün uğurların təməlində 15 İyun Milli Qurtuluş Gününün yaratdığı möhkəm siyasi və dövlətçilik dayaqları dayanır. Ulu Öndərin müəyyən etdiyi inkişaf strategiyası Azərbaycan Respublikasının Prezidenti cənab İlham Əliyev tərəfindən uğurla davam etdirilir. Son illərdə ölkəmizin iqtisadi qüdrətinin artması, beynəlxalq nüfuzunun yüksəlməsi, ordu quruculuğunda əldə edilən nailiyyətlər bu siyasətin uğurlu nəticələridir.
2020-ci ildə əldə edilən tarixi Zəfər də məhz qurtuluşdan başlayan güclənmə yolunun məntiqi nəticəsi oldu. Azərbaycan Ordusu Ali Baş Komandan İlham Əliyevin rəhbərliyi ilə 44 günlük Vətən müharibəsində parlaq qələbə qazandı, torpaqlarımız işğaldan azad edildi və ölkəmizin ərazi bütövlüyü təmin olundu. Bu böyük qələbə göstərdi ki, 1993-cü ildə əsası qoyulan güclü dövlətçilik modeli Azərbaycanın ən çətin sınaqlardan belə qalib çıxmasına imkan verir.
Bu gün işğaldan azad olunmuş ərazilərdə genişmiqyaslı quruculuq və bərpa işləri həyata keçirilir. Qarabağ və Şərqi Zəngəzur yenidən dirçəlir, şəhər və kəndlərimiz bərpa olunur, müasir infrastruktur yaradılır. Bu inkişaf prosesi də Milli Qurtuluşun ölkəmizə qazandırdığı sabitliyin, gücün və strateji baxışın təzahürüdür.
15 İyun Milli Qurtuluş Günü Azərbaycan xalqının birlik, həmrəylik və dövlətçilik iradəsinin təntənəsidir. Bu tarix sübut etdi ki, xalqın taleyi etibarlı əllərdə olduqda ən ağır sınaqlardan belə uğurla çıxmaq mümkündür. Qurtuluş Azərbaycanın dövlət müstəqilliyini qorudu, güclü dövlət quruculuğuna yol açdı və nəticədə ölkəmizi tarixi Zəfərə qovuşdurdu.
Bu gün hər bir azərbaycanlı böyük qürur hissi ilə deyə bilər ki, 15 İyun yalnız keçmişin deyil, həm də gələcəyin bayramıdır. Qurtuluşdan başlanan yol gücə, gücdən isə böyük Zəfərlərə aparan şərəfli və əbədi bir yoldur.
