Dövlət başçısı cənab İlham Əliyev cari ilin 25 iyul tarixində Göygöl, Masallı və Lerik Rayon İcra Hakimiyyətlərinin yeni başçılarını vəzifələrinə təyin olunmaları ilə əlaqədar qəbulu zamanı bildirmişdir ki, elektrik enerjisi ilə təchizat, qazlaşdırma, yol infrastrukturu, suvarma, içməli su layihələri, sosial infrastruktur layihələri icra olundu, hər rayonda müasir xəstəxana, tibb ocaqları, bir çox məktəblər inşa edildi.
Azərbaycan Respublikasının Prezidenti cənab İlham Əliyevin bilavasitə rəhbərliyi və göstərişi ilə rayonların sosial - iqtisadi inkişafına xüsusi diqqət yetirilir. Ölkəmizin paytaxtından uzaq olmasına və əsasən dağlıq, dağətəyi ərazidə yerləşməsinə baxmayaraq Göygöl rayonunda da sosial – iqtisadi inkişafa müsbət təsir göstərən bir sıra layihələr həyata keçirilmişdir. Rayonun bütün kəndləri elektrik enerjisi ilə tam təchiz olunmuşdur. Xüsusən yay aylarında elektrik enerjisinə tələbat xeyli artsa da bu sahədə heç bir problem yaşanmır.
Rayonun kəndlərinin əksəriyyətinə qaz xətləri çəkilmişdir. Müəyyən ucqar kəndlərə də qaz xətlərinin çəkilməsi nəzərdə tutulmuşdur.
Bakı – Qazax magistral yolu Göygöl rayonunun ərazisindən də keçir. Göygöl şəhərinin yaşayış olan küçələrinin əksəriyyətinə asfalt döşənmişdir. Rayonun ayrı-ayrı zonalar üzrə də asfalt yolları çəkilmişdir. Ucqar dağ kəndləri olan Çaykənd, Quşçu, Sarısu yollarına asfalt döşənmişdir.
Rayonda suvarma işləri də diqqətdə saxlanılmışdır. Kürək çayından rayon mərkəzinə içməli su xətti çəkilmişdir. Havaların quraq keçməsi ilə əlaqədar olaraq suvarma və içməli suya tələbat daha çox hiss olunur.
Göygöl rayonunda müasir tələblərə cavab verən xəstəxana tikilib istifadəyə verilmişdir. Ayrı-ayrı kəndlərdə tibb ocaqları və məktəb binaları da inşa edilmişdir.
Azad Abbasov
Göygöl RİHB-nın Topalhəsənli kənd İƏD-si üzrə nümayəndəsi
