Azərbaycan Respublikasının Prezidenti İlham Əliyevin Əbu-Dabi şəhərində "Zayed İnsan Qardaşlığı Mükafatı" ilə təltif olunması, ölkəmizin illərdir yürütdüyü multikulturalizm və sülh siyasətinin beynəlxalq miqyasda növbəti təsdiqi kimi tarixə düşdü. Bu ali mükafat təkcə bir Liderin fəaliyyətinə deyil, həm də Azərbaycanın sivilizasiyalararası dialoq mərkəzi kimi oynadığı strateji rola verilən yüksək qiymətdir. Mərasimdə Birləşmiş Ərəb Əmirliklərinin banisi Şeyx Zayed bin Sultan Əl Nəhyanın sülh irsinin müasir dünyadakı əhəmiyyəti fonunda, Azərbaycanın bu dəyərlərə sadiqliyi xüsusi vurğulandı. Bildirildi ki, Azərbaycanın təşəbbüskarı olduğu humanitar layihələr fərqli inancların birgəyaşayış modelini qlobal səviyyədə təbliğ edən ən uğurlu platformalardan biridir.
Tədbir zamanı dünya liderlərinin səsləndirdiyi fikirlər Azərbaycan Prezidentinin beynəlxalq nüfuzunun bariz göstəricisi oldu. Türkiyə Respublikasının Prezidenti Rəcəb Tayyib Ərdoğan öz müraciətində cənab İlham Əliyevin rəhbərliyi ilə Azərbaycanın həm regionda ədaləti bərpa etdiyini, həm də bəşəri dəyərlərin qorunmasında ön sıralarda dayandığını bildirdi. Eyni zamanda, Misir Ərəb Respublikasının Prezidenti Əbdülfəttah əs-Sisi Azərbaycan Liderinin bu mükafata layiq görülməsini yüksək qiymətləndirərək, onun islam dünyasında və qlobal müstəvidə sülhün və dözümlülüyün təşviqi istiqamətindəki fəaliyyətini xüsusi qeyd etdi. Misir dövlət başçısı vurğuladı ki, cənab Prezident İlham Əliyevin uzaqgörənliyi və humanitar təşəbbüsləri müasir dünyada qardaşlıq əlaqələrinin güclənməsinə, sabitliyin qorunmasına mühüm töhfədir. O, Azərbaycanın müxtəlif beynəlxalq təşkilatlar çərçivəsində islamofobiya ilə mübarizədə göstərdiyi qətiyyətli mövqeyini də bəşəriyyət üçün önəmli bir nümunə kimi xarakterizə etdi.
Cənab Prezident İlham Əliyev mərasimdəki rəsmi nitqində Azərbaycanın multikulturalizm modelinin mahiyyətini dərin təhlil edərək, bu dəyərlərin xalqımız üçün bir həyat tərzi olduğunu diqqətə çatdırdı. Dövlət başçısı sivilizasiyalararası münasibətlərin gələcəyinə toxunaraq xüsusi olaraq bildirdi: "Azərbaycan əsrlər boyu müxtəlif mədəniyyətlərin və dinlərin nümayəndələrinin sülh, mehribanlıq və ləyaqət şəraitində yaşadığı bir məkan olub. Bu gün biz multikulturalizmi dövlət siyasətimizin əsası kimi görürük və hesab edirik ki, bu, dünyada davamlı sülhə nail olmağın yeganə yoludur." O, Azərbaycanın işğaldan azad edilmiş ərazilərində bütün dini-mədəni abidələri eyni qayğı ilə bərpa etməsini bu fikirlərinin əməli sübutu kimi təqdim etdi. Prezident həmçinin qeyd etdi ki, sülh və qardaşlıq sadəcə bir çağırış deyil, hər bir dövlətin öz fəaliyyətində rəhbər tutmalı olduğu ali prinsipdir.
Yekun olaraq qeyd etmək lazımdır ki, bu təltif Azərbaycanın qlobal humanitar gündəliyi müəyyən edən ölkələrdən biri olduğunu bir daha nümayiş etdirdi. "Zayed İnsan Qardaşlığı Mükafatı" Azərbaycan-BƏƏ münasibətlərindəki mənəvi yaxınlığın rəmzi olmaqla yanaşı, ölkəmizin dünyaya çatdırdığı sülh və birgəyaşayış mesajlarının beynəlxalq səviyyədə tam dəstəkləndiyini təsdiq etdi. Bu tarixi hadisə Azərbaycanın həm müsəlman dünyasında, həm də qlobal siyasi sistemdəki humanitar liderliyini bir daha sarsılmaz etdi.
İlqar Kərimov,
YAP Tovuz Rayon Təşkilatı sədrinin müavini
