IV Şuşa Qlobal Media Forumu Prezident İlham Əliyevin çıxışı ilə təkcə media gündəminin deyil, bütövlükdə Cənubi Qafqazın və Avrasiya məkanının gələcək inkişaf istiqamətlərinin müzakirə olunduğu mühüm beynəlxalq platformaya çevrildi. “Medianın sülhün təşviqində rolu: Həqiqətin bərpası və etimadın yenidən qurulması” mövzusunda keçirilən forumda dövlət başçısının səsləndirdiyi fikirlər Azərbaycanın regional və qlobal proseslərdə artan rolunu, milli maraqlara əsaslanan xarici siyasət kursunun ardıcıllığını və ölkənin strateji baxışını bir daha nümayiş etdirdi. Forumda 53 ölkədən 160-a yaxın nümayəndənin, onlarla beynəlxalq media qurumunun və təşkilatın iştirakı bu platformanın artıq qlobal dialoq məkanına çevrildiyini göstərdi. Forumun əsas mövzusu media olsa da, Prezident İlham Əliyevin çıxışı informasiya təhlükəsizliyi və həqiqətin müdafiəsi məsələlərinə də strateji yanaşmanı ortaya qoydu. Müasir dövrdə dezinformasiya, informasiya manipulyasiyası və rəqəmsal təhdidlər dövlətlərin milli təhlükəsizliyinə birbaşa təsir göstərən amillərə çevrilib. Bu baxımdan forumda medianın məsuliyyəti, peşəkar jurnalistikanın əhəmiyyəti və süni intellekt dövründə informasiya etikasının qorunması ilə bağlı səsləndirilən fikirlər qlobal çağırışlara verilən mühüm cavab kimi qiymətləndirilə bilər.Prezident İlham Əliyevin çıxışı həm də Azərbaycanın çoxşaxəli və balanslaşdırılmış xarici siyasət kursunun davam etdiyini göstərdi. Müxtəlif beynəlxalq tərəfdaşlarla qarşılıqlı hörmət və milli maraqlar əsasında əməkdaşlığın inkişaf etdirilməsi, ölkənin müstəqil qərarvermə prinsipinə sadiqliyi Azərbaycanın beynəlxalq nüfuzunu daha da gücləndirən əsas amillərdəndir. Bu gün Azərbaycan qlobal enerji, nəqliyyat və geosiyasi layihələrin etibarlı iştirakçısı olmaqla yanaşı, regional sabitliyin qorunmasına töhfə verən aparıcı aktor kimi çıxış edir. Dövlət başçısının çıxışında enerji təhlükəsizliyi məsələləri də xüsusi yer tutdu. Azərbaycanın Avropanın enerji təhlükəsizliyində etibarlı tərəfdaş kimi rolunun getdikcə artdığı, yeni enerji layihələrinin uzunmüddətli əməkdaşlıq prinsipləri əsasında həyata keçirilməsinin vacibliyi vurğulandı. Bu yanaşma göstərir ki, enerji siyasəti artıq yalnız iqtisadi məsələ deyil, beynəlxalq təhlükəsizlik və geosiyasi sabitliyin mühüm elementidir. Prezident İlham Əliyevin çıxışının əsas siyasi xətti ondan ibarət idi ki, Azərbaycan artıq yalnız regional proseslərin iştirakçısı deyil, həmin proseslərin istiqamətini müəyyən edən dövlətlərdən biridir. Qarabağda həyata keçirilən genişmiqyaslı bərpa və yenidənqurma layihələrinin nümayiş etdirilməsi, Şuşanın beynəlxalq tədbirlərə ev sahibliyi etməsi Azərbaycanın postmünaqişə dövrünü uğurla idarə etdiyini və dağıntılar məkanını inkişaf modelinə çevirdiyini göstərir. Bu yanaşma həm də Azərbaycanın sülh gündəminin praktik nəticələrini beynəlxalq ictimaiyyətə nümayiş etdirən mühüm siyasi mesajdır. Çıxış zamanı diqqət çəkən məqamlardan biri Azərbaycanın sülh prosesinə sadiqliyinin və regionda kommunikasiyaların açılmasına verdiyi əhəmiyyətin vurğulanması idi. Prezident İlham Əliyev bildirdi ki, Azərbaycan regionda davamlı sabitliyin formalaşması üçün konkret addımlar atır, nəqliyyat və logistika marşrutlarının genişləndirilməsi isə yalnız iqtisadi deyil, həm də siyasi etimadın möhkəmlənməsinə xidmət edir. Bu yanaşma Azərbaycanın qarşıdurma deyil, əməkdaşlıq modelini irəli sürdüyünü nümayiş etdirir. IV Şuşa Qlobal Media Forumunda Prezident İlham Əliyevin çıxışı təkcə forum iştirakçılarına ünvanlanan siyasi mesajlar toplusu deyil, Azərbaycanın gələcək inkişaf prioritetlərini və beynəlxalq münasibətlər sistemində tutduğu mövqeni əks etdirən mühüm strateji sənəd xarakteri daşıyır. Şuşadan verilən mesajlar göstərdi ki, Azərbaycan müharibədən sonrakı dövrü uğurla idarə edən, sülh təşəbbüslərini təşviq edən, enerji və nəqliyyat təhlükəsizliyinə töhfə verən, informasiya məkanında həqiqətin müdafiəsini vacib hesab edən və milli maraqlarını qətiyyətlə qoruyan güclü dövlət kimi beynəlxalq gündəmdə mövqeyini daha da möhkəmləndirir.
Arifə Abbasova
YAP Tovuz rayon təşkilatının məsləhətçisi
