Diasporla İş üzrə Dövlət Komitəsinin sədri Fuad Muradov ABŞ-nin İllinoys ştatındakı Azərbaycan icması ilə görüşüb.
Rezonans.az xəbər verir ki, Azərbaycan Respublikasının və ABŞ-nin Dövlət Himnlərinin səsləndirilməsi ilə başlayan tədbir ölkəmizin ərazi bütövlüyü uğrunda canından keçən şəhidlərin əziz xatirəsinin yad edilməsi ilə davam edib.
Amerika Orta Qərb ştatları üzrə Azərbaycan Mərkəzinin təsisçiləri Fərid Məmmədov və Mehriban Məmmədova iştirakçıları salamlayıb. Sonra Mehriban Məmmədova icmanın fəaliyyəti, görülən işlərin əhatə dairəsinin daha da genişlənməsi, ABŞ-də Azərbaycan icmasının nüfuzunun get-gedə artması və yumşaq gücə çevrilmə yolunda irəliləməsi barədə danışıb.
Komitə sədri Prezident İlham Əliyevin rəhbərliyi altında həyata keçirilən diaspor siyasəti, xaricdəki Azərbaycan Evləri, Koordinasiya Şuraları, həftəsonu məktəbləri, Komitənin uğurla nəticələn irimiqyaslı layihələri, o cümlədən avqustun 1-dən 7-dək “Gənclər Yaşıl Dünya Naminə” Diaspor Gənclərinin Laçında keçirilən və dünya azərbaycanlı gənclərinin böyük marağına səbəb olan V Yay Düşərgəsi haqqında ətraflı məlumat verib.
Görüşdə iştirak edən Türkiyənin Çikaqodakı Baş konsulu Engin Tures Azərbaycan və türk diasporlarının birgə fəaliyyətinin vacibliyini qeyd edib, hər zaman diasporumuzun yanında olduqlarını dilə gətirib.
Orta Qərb Ştatları Azərbaycan Tələbə Alyansının rəhbəri Nərgiz Həbibova təşkilatın fəaliyyəti barədə məlumat verib, ABŞ-dəki tələbə gənclərin xüsusilə sosial media platformaları üzərindən şəbəkələşmə imkanlarından və təşkilatın hədəflərindən danışıb. Çıxışlarda Azərbaycanın öz ərazilərini işğaldan azad etməsinin, regionda sülhün və barışın rəmzinə çevrilməsinin soydaşlarımızı qürurlandırması, Vətən naminə daha böyük işlər görməyə həvəsləndirməsi vurğulanıb. İcma üzvləri daha güclü diaspor formalaşdırmağın vacibliyindən, birlik mexanizmlərindən, beynəlxalq təcrübənin tətbiqinin əhəmiyyətindən danışıb, gələcəkdə burada Azərbaycan Evinin açılması təklifi ilə çıxış ediblər. DİDK rəhbərliyi ilə vaxtaşırı görüşlərin keçirilməsinin və diaspor üzvləri ilə müzakirələrin aparılmasının icmalaşma prosesinə müsbət təsiri də xüsusi vurğulanıb.
Tədbirdə Diasporla İş üzrə Dövlət Komitəsinin fəaliyyətini və diaspor hərəkatında koordinasiyalı işin mahiyyətini əks etdirən videoçarxlar nümayiş olunub, icma üzvlərini maraqlandıran suallara cavab verilib, perspektivlə bağlı fikir mübadiləsi aparılıb.
Tədbir bədii hissə ilə yekunlaşıb.
